SONHU KU INDIPENDENSIA
Na seu azul di un noti streladu
Na solera porta d’un kasa’l matu
N odja un strela parsi i di rapenti
Afrika lumia di ponta pa ponta:
Luz di kel strela singular
Era brilanti sima oru na sol!
Nton na mumentu di kontisimentu
Bruxas malignu ki bira dretu
Bota badju n'un batuku sen igual.
Foguetis bira ta subi na seu
Sima fitiseras na ora di bai.
Djentis di tabanka’l Praia
ku korneta, tanboru i otus kusa,
Pasa na mi ta kanta un kantiga
Ki na nun Paraizu inda k’obida:
Era kantiga di Indipendensia
D’un tera afrikanu ki e Kauberdi.
Multidon di finadus d’Afrika
Labanta di supultura ku forsa
Pa festeja kel dia grandi na Storia.
Na meiu des tudu, un kriatura
Txoma-n enton nha atenson:
Na si kabesa, un karapusa,
Na si odjus un okulu sukuru,
Konfirma-n ki era KABRAL!
Na si mo n’dreta staba un bandera
Bandera verdi-burmedju-amarelu
D’un Partidu ki el propi
funda.
Nton N' lembra kel ora um djatu,
Na puema di Braga Tavares:
KABRAL KA MORI!!!
KABRAL staba prizenti
Na mumentu grandi di nos Storia;
INDIPENDENSIA’L KAUBERDI!
6 julhu di 1975
Bartolomeu L. Varela
(Verson original publikadu na Jornal Terra Nova)
